ما في كهربا والاسعار نار والبنزين ضرب حفة
الاربعين الف بعدين صحصحوا ونزلوه "شوي"، والمواطن مثل العادة حمل هل
الدولاب ونزل يحرق تحت البيت احتجاجا على الوضع بس ليه ما بعرف يمكن مفكر شي وزير
او نائب ساكن بالشقة لحدو. يوم بعد يوم الاوضاع لوراء وما في شي ماشي حالو بهل
البلد فكمل المواطن مسلسل الدولاب المحروق بس مش تحت البيت هل المرة على
الاوتستراد يمكن يمرأ شي مسؤول من هل الطريق ويعرف انو في مواطن عم يشكي من شي. بس
شكلن هل المسؤولين يا ما بيسلكوا هيي الطرقات لمنستخدمها وما بيحضروا نشرات
الاخبار لانو الوضع كرمالو لوراء لتوصل انو تنقطع الكهربا عن البلد كلو وما سمعنا
شي تصريح يهدّي هيدا الشعب الفاير دمو من مسخرة الكهربا. بهيدا الوضع يا خي
المواطن في احتمالان يا ضلك عم تحرق نفسك ونفس عيلتك وليجابوك بالدولاب المحروق
وهني منن هون ولا عم بحسو بلي عم تحس فيه او في خيار ثاني استعمل في السابق من
الفريقين السياسين فمع مين ما كنت ما عندك مشكلة.. اعتصام رمزي بنص البلد مع كم
خيمة وعلم لبنان وشمع منو ابردلك بهل الصيفية لما فيها كهربا ومنو انو اكيد لح
يشوفوك زعمائنا الكرام ويتفركشو فيك بالطلعة والنزلي او اقله اذا حاسسها صعبة
هيديك الشغلة عميل مسيرة مطلبية ضخمة او شي اضراب عام لمدة يوم كامل... اذا وقع
اختيارك على الاحتمال الثاني فيعني انك صرت تفكر كمواطن لبناني واذا وصلت لهل
المرحلة فلازم تفكر انو صندوق الانتخابات لناطرنا بعد اقل من سنة بحاجة لشخص عم
بحس بمعاناتك ووجعك مش بس لانو من جماعتنا وحزبنا وطايفتنا. وهون صرت بمرحلة
المواطن الصالح بس الخوف من انو هل المواطن لما يشوف ورقة الانتخابات ما يلاقي حدا
بيستاهل فبصوت لجماعتو على اساس انو "ما في غيرن"....
 |
| بيروت بلا كهرباء |